ກ່ຽວກັບ
ຂໍ້ມູນທາງການກ່ຽວກັບ ກະຊວງພາຍໃນ, ກົມພັດທະນາການບໍລິຫານລັດ ແລະ ພະແນກ ຄຸ້ມຄອງອົງການຈັດຕັ້ງສັງຄົມ ຕາມດຳລັດສະບັບເລກທີ
575/ລບ ແລະ ຂໍ້ຕົກລົງສະບັບເລກທີ 595/ພນ.
ທີ່ຕັ້ງ ແລະ ພາລະບົດບາດ ກະຊວງພາຍໃນ (ພນ)
ກະຊວງພາຍໃນ ຂຽນເປັນຕົວອັກສອນຫຍໍ້ວ່າ: “ພນ” ແມ່ນຫນຶ່ງໃນໂຄງປະກອບກົງຈັກ ຂອງລັດຖະບານ, ມີພາລະບົດບາດເປັນເສນາທິການໃຫ້ແກ່ລັດຖະບານ ໃນການຄຸ້ມຄອງມະຫາພາກ ກ່ຽວກັບການພັດທະນາ ການບໍລິຫານລັດ, ການປົກຄອງທ້ອງຖິ່ນ, ວຽກງານສາມສ້າງ, ວຽກງານຊົນເຜົ່າ, ວຽກງານສາສະຫນາ, ວຽກງານຄຸ້ມຄອງພົນລະເມືອງ, ຄຸ້ມຄອງລັດຖະກອນ, ຄຸ້ມຄອງພາລະກອນ, ຄຸ້ມຄອງຫົວຫນ່ວຍວິຊາການທີມີລາຍຮັບ, ການຄຸ້ມຄອງອົງການຈັດຕັ້ງສັງຄົມ, ວຽກງານສໍາຫຼວດວັດແທກ, ວຽກງານແຜນທີ່, ວຽກງານເອກະສານ, ວຽກງານແຂ່ງຂັນ ແລະ ວຽກງານຍ້ອງຍໍ ໃນຂອບເຂດທົ່ວປະເທດ.
ທີ່ຕັ້ງ ແລະ ພາລະບົດບາດ ກົມພັດທະນາການບໍລິຫານລັດ (ກພລ)
ກົມພັດທະນາການບໍລິຫານລັດ ຂຽນເປັນຕົວອັກສອນຫຍໍ້ວ່າ: “ກພລ” ແມ່ນກົງຈັກຫນຶ່ງຂອງກະຊວງພາຍໃນ, ມີພາລະບົດບາດເປັນເສນາທິການໃຫ້ແກ່ກະຊວງ ໃນການຄຸ້ມຄອງວຽກງານ ພັດທະນາການຈັດຕັ້ງ, ການກໍານົດຕໍາແຫນ່ງງານ, ລະບຽບການບໍລິຫານລັດ-ການຫັນເປັນທັນສະໄຫມ, ການພັດທະນາລະບົບການບໍລິການກົນໄກການບໍລິການຜ່ານປະຕູດຽວ, ລະບຽບການຄຸ້ມຄອງ-ນໍາໃຊ້ຕາປະທັບ ແລະ ການຄຸ້ມຄອງອົງການຈັດຕັ້ງສັງຄົມ ໃນຂອບເຂດທົ່ວປະເທດ ແລະ ວຽກງານນິຕິກໍາຂອງກະຊວງພາຍໃນ ຊຶ່ງເອີ້ນລວມວ່າ ວຽກງານ ພັດທະນາການບໍລິຫານລັດ.
ພາລະບົດບາດລະອຽດ 16 ພາລະບົດບາດ ແລະ ຫນ້າທີ່ ຂອງ ພະແນກ ຄຸ້ມຄອງອົງການຈັດຕັ້ງສັງຄົມ ປະຕິບັດຫນ້າທີ່ເສນາທິການໃຫ້ແກ່ຄະນະກົມ ໃນການຄຸ້ມຄອງ, ຕິດຕາມ, ກວດກາ ແລະ ສົ່ງເສີມອົງການຈັດຕັ້ງສັງຄົມໃນຂອບເຂດທົ່ວປະເທດ
- 01
ສ້າງຮ່າງຍຸດທະສາດ, ແຜນງານ, ແຜນການ ແລະ ໂຄງການ ກ່ຽວກັບການຄຸ້ມຄອງອົງການຈັດຕັ້ງທາງສັງຄົມ ໃນແຕ່ລະໄລຍະ;
- 02
ຄົ້ນຄວ້າຮ່າງນະໂຍບາຍ, ກົດຫມາຍ, ລະບຽບການ ກ່ຽວກັບການຄຸ້ມຄອງອົງການຈັດຕັ້ງທາງສັງຄົມໃນຂອບເຂດທົ່ວປະເທດ ພ້ອມທັງ ຄຸ້ມຄອງບໍລິຫານລັດກ່ຽວກັບວຽກງານອົງການຈັດຕັ້ງສັງຄົມຢ່າງລວມສູນເອກະພາບໃນຂອບເຂດທົ່ວປະເທດ;
- 03
ຄົ້ນຄວ້າ ແລະ ສະເຫນີຄະນະກົມ ຕໍ່ການສະເຫນີສ້າງຕັ້ງ, ຮັບຮອງເອົາ ການໂຮມ, ການແຍກ, ການຍຸບເລີກສະມາຄົມສັງຄົມສົງເຄາະ ແລະ ພັດທະນາສັງຄົມ ຫຼື ສະມາຄົມທີ່ເຄື່ອນໄຫວກວມເອົາສອງຂະແຫນງການຂຶ້ນໄປ;
- 04
ຄົ້ນຄວ້າ ແລະ ສະເຫນີຫົວຫນ້າກົມພິຈາລະນາ ຈົດທະບຽນ, ຕໍ່ທະບຽນ ຫຼື ລຶບຊື່ ສະມາຄົມ ອອກຈາກບັນຊີທະບຽນ ພາຍຫຼັງກະຊວງ, ຂະແຫນງການໄດ້ອະນຸມັດ ຫຼື ຍຸບເລີກແລ້ວ;
- 05
ຄົ້ນຄວ້າ ແລະ ສະເຫນີຄະນະກົມຕໍ່ການສະເຫນີ ສ້າງຕັ້ງ, ຮັບຮອງເອົາ ການໂຮມ, ການແຍກ, ການຍຸບເລີກ ມູນນິທິ ທີ່ເຄື່ອນໄຫວໃນຂອບເຂດທົ່ວປະເທດ ພ້ອມທັງ ຕິດຕາມ, ກວດກາ ແລະ ປະເມີນຜົນ ການເຄື່ອນໄຫວວຽກງານຂອງ ມູນນິທິ;
- 06
ຕິດຕາມ, ກວດກາ ແລະ ປະເມີນຜົນ ການເຄື່ອນໄຫວວຽກງານຂອງ ສະມາຄົມສັງຄົມສົງເຄາະ ແລະ ພັດທະນາສັງຄົມ ຫຼື ສະມາຄົມທີ່ເຄື່ອນໄຫວກວມເອົາສອງຂະແຫນງການຂຶ້ນໄປ;
- 07
ເຜີຍແຜ່, ແນະນໍາກະຊວງ, ອົງການ ແລະ ອົງການປົກຄອງທ້ອງຖິ່ນ ໃນການສ້າງ ແລະ ຄຸ້ມຄອງ-ການເຄື່ອນໄຫວຂອງສະມາຄົມ ແລະ ມູນນິທິ ໃນຂອບເຂດທົ່ວປະເທດ;
- 08
ແນະນໍາ, ກ່າວເຕືອນ ຫຼື ສະເຫນີຄະນະກົມ ເພື່ອສະເຫນີຂັ້ນເທິງອອກຄໍາສັ່ງໃຫ້ສະມາຄົມ ແລະ ມູນນິທິ ທີ່ກະຊວງພາຍໃນອະນຸມັດ ຢຸດເຊົາການເຄື່ອນໄຫວ ໃນກໍລະນີເຫັນວ່າມີການລະເມີດກົດລະບຽບ, ຂໍ້ຫ້າມ ຫຼື ເຄື່ອນໄຫວຂັດກັບກົດຫມາຍ ແລະ ລະບຽບການຕ່າງໆຂອງລັດທີ່ໄດ້ວາງອອກ;
- 09
ຄົ້ນຄວ້າ ແລະ ລາຍງານຄະນະກົມ ເພື່ອນໍາສະເຫນີຂັ້ນເທິງພິຈາລະນາ ຍ້ອງຍໍສະມາຄົມ ແລະ ມູນນິທິທີ່ມີຜົນງານດີເດັ່ນ, ລົງວິໄນ, ແກ້ໄຂຄໍາຮ້ອງທຸກ ແລະ ຄໍາສະເຫນີຕ່າງໆ ຂອງອົງການຈັດຕັ້ງສັງຄົມຕາມຂອບເຂດສິດຂອງກົມ;
- 10
ເກັບກໍາ, ສັງລວມຂໍ້ມູນ, ສະຖິຕິ ແລະ ການເຄື່ອນໄຫວຂອງອົງການຈັດຕັ້ງສັງຄົມ ໃນຂອບເຂດທົ່ວປະເທດ;
- 11
ສ້າງ ແລະ ປັບປຸງຖານຂໍ້ມູນ ເພື່ອຄຸ້ມຄອງອົງການຈັດຕັ້ງສັງຄົມໃນຂອບເຂດທົ່ວປະເທດ (ລະບົບ LaoCSO);
- 12
ຊ່ວຍຄະນະກົມ ເພື່ອໂຄສະນາເຜີຍແຜ່, ແນະນໍາ ແລະ ຊຸກຍູ້ ການຈັດຕັ້ງປະຕິບັດບັນດາ ນະໂຍບາຍ, ກົດຫມາຍ ແລະ ລະບຽບການກ່ຽວກັບການຄຸ້ມຄອງອົງການຈັດຕັ້ງສັງຄົມໃຫ້ພາກສ່ວນຕ່າງໆທີ່ກ່ຽວຂ້ອງ;
- 13
ຈັດກອງປະຊຸມສໍາມະນາດ້ານວິຊາການ ກ່ຽວກັບການຄຸ້ມຄອງອົງການຈັດຕັ້ງສັງຄົມ ຕາມການອະນຸມັດ;
- 14
ແລກປ່ຽນບົດຮຽນ, ຮ່ວມມືກັບຕ່າງປະເທດ ແລະ ອົງການຈັດຕັ້ງຕ່າງໆ ເພື່ອປັບປຸງການຄຸ້ມຄອງອົງການຈັດຕັ້ງສັງຄົມ ຕາມໂຄງການຂອງກົມ ແລະ ຕາມການອະນຸມັດ;
- 15
ສະຫຼຸບລາຍງານການເຄື່ອນໄຫວວຽກງານຕ່າງໆຂອງພະແນກ ໃຫ້ຄະນະກົມຊາບເປັນປົກກະຕິ;
- 16
ປະຕິບັດຫນ້າທີ່ອື່ນ ຕາມການມອບຫມາຍຂອງຄະນະກົມ.